تويت
الدم ميّه شعر/ سمير الأمير
عاميه مصريه
( إلى فتاة المحمودية التى اغتصبها جندى أمريكى وقتلها هى وكل أسرتها)
الدم ميه والهوا مخنوق
فى المحموديه البنت مغصوبه
تشكى العروبه لكدابين السوق
اللى سابوها وراحوا يتغدوا
شديت عقالك يابو الدماغ طوبه
دلدلت ديلك والأمريكان شدوا
على بنت عمك ف العراق يا جبان
والدم ميه وانت دمك جاز
وسعلى صدرك كده
لا مؤاخذه يا أخينا
بنت العراق كشفت مخازينا
من المحيط للخليج سوقنا الطناش ع الهبل
هيه خطيّه واحنا فيران الجبل
وكل فسل و... عامل أمير فينا
يقعد على البرميل ويعد دولاراته
ويرضى بوش وشارون لوحكمت على مراته
بنت العراق ماتت علشان أصول الشرف
واحنا اللى (جتنا قرف) عشنا بظروف التجاره
ورفعنا راية الدعاره با سم الكلام الشديد :-
تحيا العروبه تحت السلالم وع الرفوف
تحيا العروبه ع الجدار جوه الكهوف
تحيا العروبه ف (الطُرب)*
وع الجِمال زى الجرب
تحيا العروبه بس من غير العراق
تحيا العروبه بالأدب
تحيا العروبه وتموت فتاة المحموديه
علشان نصدر نفط ونصفى القضيه
والدم ميّه.. الدم ميّه.. الدم ميّه!
* الطرب= القبور
تعليق